* ఆలయ కమిటీ, అధికారులకు ఎమ్మెల్యే పరిటాల సునీత భరోసా
* ఎమ్మెల్యే సునీతను కలిసిన ఈఓ, డీఈ, పూజారులు
* 12కోట్లతో ఆలయ అభివృద్ధి పనులు.. నిధుల విషయంపై చర్చ
* త్వరలో మంత్రులు, టీటీడీ ఛైర్మన్ ను కలుద్దామన్న ఎమ్మెల్యే
అనంతపురం : జిల్లాలో ప్రసిద్ధ పుణ్యక్షేత్రమైన ఆత్మకూరు మండల పరిధిలోని పంపనూరు సుబ్రహ్మణ్యేశ్వర స్వామి ఆలయ నిర్మాణానికి నా వంతు సహకారం అందిస్తానని రాప్తాడు ఎమ్మెల్యే పరిటాల సునీత అన్నారు. ఆలయ పునర్నిర్మాణానికి సంబంధించి ఆలయ కమిటీ, ఈఓ, డీఈ శ్రీనివాసులు, పూజారులు ఎమ్మెల్యే సునీతను కలిశారు. అనంతపురంలోని క్యాంప్ కార్యాలయంలో ఎమ్మెల్యేతో కలిసి పలు అంశాల పై చర్చించారు. మొత్తం ఆలయ నిర్మాణానికి 12కోట్ల రూపాయల వరకు ఖర్చవుతుందని వివరించారు. ఇందులో తిరుమల తిరుపతి దేవస్థానం నుంచి ఎంత నిధులు, కామన్ గుడ్ ఫండ్ నుంచి ఎంత నిధులు తీసుకోవాలన్న అంశాల గురించి చర్చించారు. ఇప్పటికే ఆలయం తరుఫున కొంత మొత్తం మ్యాచింగ్ గ్రాంట్ ఖర్చు చేసేందుకు సిద్ధంగా ఉన్నట్టు వారు తెలిపారు. మిగిలిన నిధులకు సంబంధించి ఎలా చేయాలన్న దానిపై చర్చించారు. దీనిపై త్వరలో టీటీడీ ఛైర్మన్ బి.ఆర్.నాయుడు, దేవాదాయశాఖ మంత్రి ఆనం రామనారాయణరెడ్డిని కలుద్దామని ఎమ్మెల్యే సునీత చెప్పారు. ఆలయానికి కావాల్సిన నిధులు తెప్పించేలా కృషి చేస్తానన్నారు.
