నంద్యాల : ప్రకృతి వ్యవసాయమే ఆరోగ్యకర సమాజ నిర్మాణానికి దారితీస్తుందని ఆంధ్రప్రదేశ్ రాష్ట్ర న్యాయశాఖ మరియు మైనార్టీ సంక్షేమ శాఖ మంత్రి ఎన్ఎండి ఫరూక్ అన్నారు. స్థానిక పట్టణంలోని టేక్కే మార్కెట్ యార్డ్‌లో ఏర్పాటు చేసిన కామధేను సిరి సంపద – నవనందుల నంద్యాల చెంత గో ఆధారిత ప్రకృతి వ్యవసాయ ఉత్పత్తుల సంత కార్యక్రమంలో ఆయన పాల్గొన్నారు. ఈ సందర్భంగా ఆయన మాట్లాడుతూ రసాయన ఎరువులు, పురుగుమందులు లేని ఆహారం ప్రజల ఆరోగ్యాన్ని కాపాడుతుందని పేర్కొన్నారు. రాష్ట్ర ప్రభుత్వం ప్రకృతి వ్యవసాయాన్ని ప్రోత్సహించడానికి కట్టుబడి ఉందని చెప్పారు. గో ఆధారిత వ్యవసాయం భూసారాన్ని పెంచడంలో, పర్యావరణ సమతుల్యత కాపాడడంలో కీలక పాత్ర పోషిస్తుందని తెలిపారు. రైతులు ఈ విధానాన్ని అనుసరించి స్వచ్ఛమైన ఆహార ఉత్పత్తులు చేయాలని పిలుపునిచ్చారు. అలాగే మార్కెట్ యార్డ్ చైర్మన్ గుంటుపల్లి హరిబాబు మాట్లాడుతూ రైతులకు ప్రకృతి వ్యవసాయ ఉత్పత్తుల విక్రయానికి మార్కెట్ యార్డు పూర్తి సహకారం అందిస్తుందని చెప్పారు. ఈ సంత ద్వారా రైతులు తమ ఉత్పత్తులను నేరుగా వినియోగదారులకు విక్రయించే వేదికగా ఉపయోగించుకోవచ్చన్నారు.ఈ సంతలో గో ఆధారిత ఉత్పత్తులు, దేశవాళీ వంగడాలు, చిరుధాన్యాలు, ఆయుర్వేద ఉత్పత్తులు ప్రదర్శనకు ఉంచారు. మంత్రి ఫరూక్ స్టాల్స్‌ను పరిశీలించి రైతులతో, వినియోగదారులతో ముచ్చటించారు.
ఈ కార్యక్రమంలో ఎస్.పీకే ప్రచార సాధకులు విజయరాం, మార్కెట్ యార్డ్ వైస్ చైర్మన్ రంగ ప్రసాద్, పారిశ్రామికవేత్త పబ్బతి వేణు, డిపిఎం శ్రీనివాసులు యాదవ్, ఏడిపిఎం అబ్దుల్ సలాం, కామధేను సిరి సంత వ్యవస్థాపకులు కర్రెద్దుల బాలమదిలేటి, సుబ్బారావు, ధనుంజయ రెడ్డి, లత, తదితరులు పాల్గొన్నారు.
